ड्रेसिंग रूममध्ये घुसून सचिन तेंडुलकरला कोणी दिली ऑफर? मद्य आणि तंबाखूच्या जाहिरातीबाबत सचिनचा खुलासा
Sachin Tendulkar : सचिन तेंडुलकरने 1996 च्या वर्ल्ड कप दरम्यान तो कोणतेही स्टिकर न लावलेल्या बॅटने का खेळला याबाबत सांगितले, तसेच मद्य आणि तंबाखूच्या जाहिराती प्रमोट न करण्याच्या निर्णयाबाबत सुद्धा त्याने खुलासा केला.
Sachin Tendulkar : मास्टरब्लास्टर सचिन तेंडुलकर याने आंतरराष्ट्रीय क्रिकेटमधून निवृत्ती घेतलेल्याला 16 नोव्हेंबर 2026 रोजी 13 वर्ष पूर्ण झाली. यानिमित्ताने वानखेडे स्टेडियममध्ये असलेल्या मुंबई क्रिकेट असोसिएशन एमसीए शरद पवार क्रिकेट संग्रहालयात भारतरत्न सचिन तेंडुलकरला समर्पित असलेल्या 'बॅटोग्राफी' या अनोख्या दालनाचे अनावरण करण्यात आले. या दालनात सचिन तेंडुलकरच्या पहिल्या बॅटपासून ते शेवटच्या टेस्ट सामन्यातील बॅट पर्यंत अशा 26 बॅटचं कलेक्शन या दालनात असून याशिवाय सचिनचे काही हेडगेअर्स आणि वस्तू सुद्धा येथे ठेवण्यात आलेल्या आहेत. यानिमित्ताने संवाद साधताना सचिनने तो करिअरच्या सुरुवातीला बराचकाळ बॅटवर कोणतेही स्टिकर लावून का खेळत नव्हता याबाबतचा किस्सा सांगितला.
बॅटवर कोणतेही स्टिकर लावून का खेळत नव्हता?
सचिन तेंडुलकरने यावेळी संवाद साधताना 1996 च्या वर्ल्ड कप दरम्यानचा एक किस्सा सांगितला. सचिन म्हणाला की, 1996 च्या वर्ल्ड कप दरम्यान त्याला अशी एक ऑफर मिळाली होती, परंतु त्याने ती स्वीकारली नाही'. सचिन म्हणाला की त्यानंतर सुमारे दोन वर्षे तो कोणत्याही कंपनीचे स्टिकर नसलेली बॅट वापरून खेळला.
सचिन म्हणाला की, '1996 च्या वर्ल्ड कपच्या सुरुवातीला मला सुरुवातीच्या दोन सामन्यात मॅन ऑफ द मॅच पुरस्कार मिळाला. कोणतेही स्टिकर न लावलेल्या बॅटने खेळून मला तेव्हा खूप चांगलं वाटत होतं. तसेच त्याकाळात जर तुम्ही कोणत्या खेळाडू किंवा मॅनेजरला भेटत असाल तर सामन्याच्या दरम्यान सुद्धा तुम्ही खेळाडूंच्या ड्रेसिंग रूममध्ये जाऊ शकत होतात'.
सचिन तेंडुलकरने पुढे सांगितलं की, ' आम्ही वानखेडेवर ऑस्ट्रेलिया विरुद्ध खेळत होतो. आम्ही दुसऱ्या इनिंगमध्ये फलंदाजी केली होती. मला लक्षात आहे की एका परदेशी कंपनीचे डायरेक्टर ड्रेसिंग रूममध्ये आले. मला कंपनीचं नाव घेऊ इच्छित नाही पण त्यांची कंपनी आधी सुद्धा माझ्या सोबत बातचीत करत होती. ते म्हणाले की आम्ही तुमच्या सर्व अटी मान्य करण्यासाठी तयार आहोत, तुम्ही आमच्या कंपनीचा स्टिकर तुमच्या बॅटवर लावा. मात्र मी तेव्हा त्यांना म्हणाला की मी जरा अंधविश्वासू आहे. स्टिकर न लावलेल्या बॅटने खेळल्याने माझ्या चांगल्या धावा होत आहेत. तेव्हा वर्ल्ड कप संपल्यावर यावर बोलूयात'.
सचिन म्हणाला त्याकाळात सुद्धा अनेक मद्य आणि तंबाखूच्या जाहिरातींसाठी त्याला ऑफर येत होत्या. माझ्या वडिलांना दिलेला शब्द आणि स्वइच्छेने घेतलेल्या काही निर्णयांमुळे मी माझ्या आयुष्यात कधीही मद्य आणि तंबाखूच्या जाहिराती केल्या नाहीत आणि करणार देखील नाही.