चौथ्या सामन्यात भारताच्या 6 विकेट्स घेणाऱ्या न्यूझीलंडच्या खेळाडूला सामन्यानंतर विराट कोहलीने दिलं गिफ्ट, Video केला शेअर
IND VS NZ 4th ODI : चौथ्या सामन्यात भारताच्या 6 विकेट्स घेणाऱ्या न्यूझीलंडच्या मॅट हेनरी या गोलंदाजाला विराट कोहलीने त्याची जर्सी गिफ्ट केली. सामना संपल्यावर विराट आणि मॅट हेनरी यांचा व्हिडीओ सोशल मीडियावर व्हायरल होत आहे.
IND VS NZ 4th ODI : भारत विरुद्ध न्यूझीलंड यांच्यात पाच सामन्यांची वनडे सीरिज खेळवली जात असून यातील चौथा सामना शुक्रवारी खेळवला गेला. यात टीम इंडियाला न्यूझीलंडकडून लाजिरवाणा पराभव स्वीकारावा लागला. विजयासाठी 334 धावांचं टार्गेट असताना टीम इंडिया अवघ्या 89 धावांवर ऑलआउट झाली. यात टीम इंडियाची दिग्गज फलंदाजांची फळी समाधानकारक धावा करण्यात अपयशी ठरली. चौथ्या सामन्यात टीम इंडियाच्या फलंदाजांसाठी काळ ठरलेला टीम इंडियाचा फलंदाज मॅट हेनरी याला सामना संपल्यावर विराटने एक खास गिफ्ट दिलं. मॅट हेनरीने या सामन्यात विराटसह रोहित शर्मा, श्रेयस अय्यर अशा तब्बल 6 फलंदाजांच्या विकेट्स घेतल्या.
न्यूझीलंडने दिलेलं 334 धावांचं टार्गेट :
भारताचा कर्णधार श्रेयस अय्यरने टॉस जिंकून प्रथम गोलंदाजी निवडली. यावेळी टीम इंडियाने न्यूझीलंडच्या 50 ओव्हरमध्ये 10 विकेट घेऊन 333 धावांवर रोखलं. यात न्यूझीलंडच्या विल याँगने सर्वाधिक 125 धावांची खेळी केली. तर भारतीय गोलंदाजांपैकी औकिब नबी, गुरनूर बरार आणि अक्षर पटेल यांनी सर्वाधिक 2 विकेट तर अर्शदीप सिंह आणि नमन धीर या दोघांनी प्रत्येकी 1 विकेट घेतली. न्यूझीलंड संघाने भारताला विजयासाठी 334 धावांचं टार्गेट दिलं. हे टार्गेट भारतीय दिग्गज फलंदाज यशस्वीपणे पूर्ण करू शकतील अशी अपेक्षा असताना टीम इंडियाची फलंदाजी ढासळली.
हेही वाचा : भर मैदानात राडा! गुरनूर बरार थेट न्यूझीलंडच्या फलंदाजाशी भिडला, विराट कोहली मधे पडला, नेमकं काय झालं? Video
विजयाचं आव्हान पूर्ण करण्यासाठी मैदानात आलेले भारतीय फलंदाज चांगली कामगिरी करू शकले नाहीत. पहिल्याच ओव्हरमध्ये मॅट हेनरीने रोहित शर्मा, विराट कोहली आणि श्रेयस अय्यर या तिघांना बाद केलं. यावेळी भारताचा स्कोअर 3 विकेटवर 2 धावा असा होता. दिग्गज फलंदाज भोपळा देखील न फोडता माघारी परतले. त्यानंतरही मॅट हेनरी थांबला नाही, त्याने आपल्या गोलंदाजीने ईशान किशन, कुलदीप यादव आणि गुरनूर बरार या तिघांना सुद्धा बाद केलं. मॅट हेनरीने 9.4 ओव्हरमध्ये केवळ 27 धावा देऊन एकूण 6 विकेट घेतल्या. याशिवाय मॅथ्यू फिशरने 3 तर काईल जेमिसनने 1 विकेट घेतली. टीम इंडियाच्या फलंदाजांना न्यूझीलंडच्या गोलंदाजांनी अवघ्या 89 धावांवर ऑलआउट केले आणि 244 धावांनी सामना जिंकला. सामना संपल्यावर दोन्ही संघाच्या खेळाडूंनी हस्तांदोलन केलं. त्यानंतर ड्रेसिंग रूममध्ये जाऊन विराटने त्याची भारतीय जर्सी ही न्यूझीलंडचा गोलंदाज मॅट हेनरीला गिफ्ट केली. मॅट हेनरीला या सामन्यात प्लेअर ऑफ द मॅचचा खिताब सुद्धा मिळाला होता.