एकीकडे दुष्काळाच्या झळा तर दुसरीकडे कर्जवसुलीचा फास, हिंगोलीच्या मजुरांवर दुहेरी संकट, राहत्या घराबाहेर लावले विक्रीचे फलक

गजानन वाणी, (प्रतिनिधी) हिंगोली : अपुऱ्या पावसामुळे सध्या राज्यातील अनेक जिल्ह्यांमध्ये दुष्काळ जाहीर करण्यात आला आहे. पाऊस न पडल्याने शेतकऱ्यांच्या शेतीचं मोठ्या प्रमाणात नुकसान झालं असून अनेकांसमोर मोठं आर्थिक संकट उभं राहिलं आहे. दुष्काळाने हातचं काम हिरावलं असतानाच आता एकीकडे कर्जाच्या हप्त्यांनी देखील लोकांचं जगणंही मुश्किल केलंय. हिंगोलीच्या वाघजाळीत पोटाची खळगी भरण्यासाठी मजुरी मिळत नाही आणि अशातच शेतकऱ्यांच्या मागे कर्जवसुलीचा तगादा काही थांबत नाहीये. या दुहेरी संकटाने हतबल झालेल्या मजुरांनी चक्क आपल्या घरांवरच घर विकणे आहे असे फलक लावलेत. एका कुटुंबाची नव्हे, तर गावातील दहा कुटुंबांची ही व्यथा आहे. पाहूया दुष्काळ आणि कर्जाच्या कचाट्यात सापडलेल्या मजुरांची ही विदारक कहाणी.

एका बाजूला दुष्काळाच्या झळा तर तर दुसऱ्या बाजूला कर्जवसुलीचा फास, हिंगोलीच्या वाघजाळीत मजुरांवर दुहेरी संकट ओढवलंय आहे. पावसाअभावी शेतीची पिकं करपली मजुरीची कामंही बंद झाली. हाताला काम नाही, पोटाला अन्न नाही आणि अशा परिस्थितीत कर्जाचे हप्ते फेडायचे तरी कसे? असा प्रश्न शेतकऱ्यांना पडला आहे.

हेही वाचा : 'शेतकऱ्यांचे लचके तोडण्याची...', ठाकरेंच्या शिवसेनेचा हल्लाबोल; संजय गायकवाडांचा 'लांडगा' असा उल्लेख करत म्हणाले, 'विधान भवनाबाहेर...'
 

यापैकी एक समाधान मोरे हे व्यक्ती आहेत. रोजंदारीवर कुटुंबाचा उदरनिर्वाह करणाऱ्या समाधान यांच्यावर 5 जणांच्या कुटुंबाची जबाबदारी आहे. पण सध्या त्यांच्या हाताला काम नाही. मायक्रो फायनान्सकडून घेतलेल्या कर्जाचे हप्तेही थकलेत.पूर्वी दर पंधरा दिवसांनी हप्ते भरले जायचे.मात्र दुष्काळाने रोजगार हिरावला आणि कर्जफेडीचं गणित पूर्ण बिघडलं. त्यातच वसुलीचा तगादा सुरू झाला. एजंट घरासमोर येऊन बसतात. पैशांसाठी दबाव टाकतात. लोकांसमोर अपमान सहन करावा लागतो अशी मजुरांची व्यथा आहे. या रोजच्या मानसिक त्रासाला कंटाळून समाधान मोरे यांनी आपल्या घरावरच घर विकणे आहे असा फलक लावला आहे. कर्ज फेडण्यासाठी आता घर विकण्याची वेळ त्यांच्यावर आली आहे.  ही केवळ समाधान मोरेंची कहाणी नाही. वाघजाळीतील जवळपास दहा कुटुंबांवर अशीच वेळ आली आहे.

दुष्काळाने रोजगार हिरावला, कर्जाने जगणं अवघड केलं आणि वसुलीच्या दबावाने घर विकण्याचा निर्णय घ्यायला भाग पाडलं. या प्रकरणावर क्रांतिकारी शेतकरी संघटनेनेही संताप व्यक्त केलाय. मायक्रो फायनान्स कंपन्यांच्या वसुलीवर नियंत्रण आणावं. वाघजाळीसह हिंगोली जिल्ह्यात दुष्काळी पॅकेज जाहीर करावं. तसेच बेरोजगार मजुरांच्या हाताला काम द्यावं अशी मागणी संघटनेचे मराठवाडा अध्यक्ष गजानन कावरखे यांनी केली आहे.